Лӱмгече: Иван Ямбердовлан — 60 ий!

Россий Федерацийын сулло сӱретчыже Иван Михайлович Ямбердов таче – 60 ияш лӱмгечыжым палемда.
Иван Михайловичын лӱмгечыжлан пӧлеклалтше ятыр мероприятий эрта. 13 шагатлан Йошкар-Олан историй тоштерыштыже Валерий Тумбаевын «Богема провинций. Художник Иван Ямбердов» фотоончерже, фотоальбом да «360 градус» каталог презентаций лиеш. 14 шагатат 30 минутлан Амстердам площадьыште верланыше Усталык ушем пӧртыштӧ Иван Ямбердовын ончерже почылтеш. Тыгак 16 шагатлан Калыкле художественный галерейыште Иван Ямбердовын ончерже почмаш лиеш.  18 шагатат 30 минутлан М. Шкетан лӱмеш театрыште сӱретчын усталык касше эрта.
Иван Михайлович Волжск районысо  Чодраялыште шочын-кушкын. 1983-шо ий гычак тудо сӱрет сымыктыш фонд Марий пӧлкажын уста сӱретчыже лийын. Ятыр портрет да пейзажын авторжо. «Сандалык», «Йошкар имне-влак», «Ӱшан», «Овдасола-92» да «Мӱкш отар» сӱретше-влаклан 1993-шо ийыште кугыжаныш премий дене палемдалтын. Иван Михайловичын пашаже-влакым Финляндийысе, Венгрийысе, Израильысе, Италийысе, Эстонийысе да Элнан тӱрлӧ олаласе тоштерлаште ужаш лиеш.
Иван Михайлович, «Кидшер» интернет-журналын коллективше алал кумылын тендам лӱмгечыда дене саламла. Ончыкыжымат у, шонаш таратыше радынам шочыкташ йодына, таза лийза. Шочмо кечыда дене!

Кидшер
Шонымашым ешараш