Удмуртий гыч марий йылмым тунемыт

МарГУ-што туныктымо да кӱшыл квалификациян кадрым ямдылыме системе эре уэм толеш. Тидын шотышто ятыр опытым погымо. Тудым пошкудо вузлаштат шыҥдараш лиеш. Теве ынде Финн-угор университет-влак ассоциаций кышкарыште ятыр ий Удмурт кугыжаныш университет ден сай паша кылым кучат. МарГУ-со калык культур да тӱвыра кокласе кыл институт ден УдГУ-со удмурт филологий, финноугроведений да журналистике институт студент мобильность программе почеш пашам ыштат.  Тудын дене келшышын, марий студент-влак Ижевскыште, а тусо ӱдыр-рвезе-влак Йошкар-Олаште тунемыт. Ик семестр жапыште йылме практикым эртат, финн-угор калыкын культурыжым, моло предмет-влакым тунемыт. Тӱҥ шотышто тыгай программым ончыкыжо илышыштым йылме науко дене кылдаш шонышо самырык еҥ-влак ойырен налыт. Тыгак кӧ Эстонийыште стажировкым эрташ ямдылалтеш.
Кызыт мемнан дене Ижевск гыч Ирина Долгова, Елена Никонова да Иван Рыбаков шинчымашым погат. Нуно чыланат кокымшо курсышто тунемыт. А УдГУ-шко мемнан деч Елена Ефремова, Анна Родыгина да Николай Иванов каеныт. Нуно удмурт да китай йылме дене кутырымо практикым налыт. А одо студент-влак марий, финн але венгр йылмым шымлат.

Леонид Гимаев

Кидшер
Шонымашым ешараш