Кайышаш корно кужу, ыштышаш паша шуко!

Кеҥеж пагыт эртымек театр-влак у тургымым почыныт, тӱрлӧ усталык рӱдер-влак пашам тӱҥалыныт. Мер ушем-влакат шеҥгелан огыт код.
Эртыше кечылаште «ВийАр» тӱвыра да келшымаш кыл ушем Оршанке районысо Керде ялыште верланыше «Кугу маска» каныме базыште самырык активист-влакым чумырен. Тиде мероприятийыш тыгак МАФУН-ын 2003-2005 ийлаште лийше президентше Василий Петров, Марий Эл Республикысе тӱвыра, печать да калык-влакын пашашт шотышто министерствын пашаеҥже Игорь Садовин, Мер Каҥашын еҥже, кидмастар Виталий Кудрявцев ушненыт. Тушто активист-влак мер пашаштым иктешленыт, ончыкылык паша радамым каҥашеныт. 
«ВийАрын» у проектше – «Марий ончылъеҥ» семинар нерген Николай Любимов палдарен. «Семинар жапыште тренинг, оҥай лекций, практик паша, палыме еҥ дене вашлиймаш-влак эрташ тӱҥалыт. Эн тӱҥжӧ самырык-влак ешартыш шинчымашым налыт, умбакыжым шкеныштым тӱрлӧ мероприятийлаште ончыктен кертыт», – палдарен «ВийАр» тӱвыра да келшымаш кыл ушем вуйлатыше.

Чумыргышо активист-влак каненат сайын шуктеныт: маска дене вашлийыныт, бильярд дене модыныт, марий мончашке пуреныт.
«Тиде мероприятий мыланем пеш келшыш. Йолташ-влак дене вашлийым. У еҥ-влак дене палыме лийым. Тӱрлӧ темылан мутланымаште шканем пайдале информацийым нальым. Ончыкшым тыгай погынымаш лийыт гын, пеш сай лиеш», — шке шонымашыжым ойла Елена Рублёва.
Эртыше мероприятийым эртараш полшымылан «Кугу маска» каныме базын уста пашаеҥыштлан да базын вуйлатышыже Григорий Иванович Тихоновлан кугу таум ойлат.