Тений шочмо калыкнан эртыме корныштыжо икымше марий газет лекмылан 100 ий темын.
Эртыше 100 ий жапыште газет тӱрлӧ лӱм дене лектеден шоген: «Война увер», «Ӱжара», «Йошкар кече», «Марий коммунист», «Марий комуна», а 1991 ий гыч «Марий Эл» лӱм дене палыме улеш. Тиде савыктыш просветитель, литератор, этнограф Павел Глезденёвын тыршымыжлан кӧра ош тӱням ужын.
Лӱмгечыжлан пӧлеклалтше тӱрлӧ сынан мероприятий, конкурс ден акций-влак идалык жапыште эртеныт. 6 ноябрьыште «Марий Эл» газетын 100 ияш да Марий Эл Республикын 95 ияш лӱмгечыштлан пӧлеклалтше концерт (ныл шагат шуйнен) М. Шкетан лӱмеш национальный драме театрыште лие.
Тӱвыра аланыште, мер пашам шуктышо, республикысе да финн-угор коллеге-влак шке саламмутыштым каласеныт. Палемден кодыман, газетын тӱҥ редакторын алмаштышыже Светлана Белковалан РФ тӱвыран сулло пашаеҥже чап лӱм дене палемдалтын.
Пайрем касыш «Марий Эл» газетын ветеранже, поро да ӱшанле йолташыже, лудшо-влак толыныт. Уна-влак театрын фойештыже республикысе книга, газет ден журнал, фото ончер-влакым ончен кертыныт.
Сылне пайремым профессионал мурызо-влак сӧрастареныт. Нине мурызо-влак чыланат республикыштына чапым да кӱкшӧ лӱмым налыныт, сандене калык нуным шокшын вашлийын. Икманаш, касышке толшо ончышо-влак сай, поро а эн тӱҥжӧ марий шӱлыш дене каеныт.
Ушештарем, «Марий Эл» газетлан кеч-могай жапыште электрон подпискым ышташ лиеш. Акше пел ийлан – 300 теҥге (ик тылзылан – 50 теҥге). Тидланже 8-905-008-28-25 номерыш оксам пыштыман да pektanmariel@mail.ru адрес дене шижтарыман.
