«Универвидений – 2015» конкурсын сеҥышыже – МарГУ-н студенткыже

Шукерте огыл Сыктывкар олаште «Универвидений – 2015» Россий кӱкшытан конкурс эртен. Финалын 12 участникше коклашее Марий кугыжаныш университетысе калыкле тӱвыра да тӱвыра кокласе коммуникаций институтын студенткыже Ида Симонова логалын.
Ныл кече жапыште конкурсант-влак дене кумдан палыме «Успех» вокал студийын вуйлатышыже, «Балаган лимитед» группын солисткыже Светлана Смирнова, мурызо-влак, Эстраде, кино да телевидений школын вокал дене педагогшо-влак Наталья Бойко ден Оксана Павловская, хореографий дене тӱнямбал куштымо конкурс-влакын лауреатше Виктория Эберт ден Театр сымыктыш институтын педагогшо Марина Щетинина пашам ыштеныт.
Конкурсын финалыштыже Моско, Тверь, Ижевск, Ханты-Мансийск, Санкт-Петербург, Салехард, Кемерово, Тюмень, Абакан да Кстов гыч эн талантан ӱдыр-рвезе-влак таҥасеныт. «Универвидений – 2015» конкурсышто сеҥаш пиал мемнан студенткына Ида Симоновалан шыргыжалын. Тудо «На острове любви» мурым йоҥгалтарен. Зритель-влакын йӱклымашышт деч вара Ида 136 балл дене икымше верыш нӧлталтын.
Кеч-могай сеҥымашат куштылгын ок тол. Ида Симоновалан гын, поснак тыршаш логалын. Молан манаш гын, тудо уста мурызо, студентка гына огыл, сай пелаш да самырык ава. 8 тылзаш Мартин эргыж ден Станислав пелашыжат тиде пагытыште пеленжак лийыныт.
Пӧлек да диплом дене пырля Идалан эше «Россий студент шошо» фестивальыш ӱжмашым кучыктеныт. Тудо тений Казань олаште эрта.
Тиде сеҥымаш дене Ида Симоновам шокшын саламлена да у усталык кӱкшытым тыланен кодына!

Леонид Гимаев.

Кидшер
Шонымашым ешараш