Кодшо ийын 19 мартыште писатель, журналист Валентин Исенековын шочмыжлан 80 ий теме. Валентин Борисовичын лӱмгечыжлан «Ямде лий» газет редакций «Капар тукым» книгажым ямдылен. Тудым Марий Эл Республикысе тӱвыра, печать да калык-влак паша шотышто министерствын массовый информаций да книгам савыктен лукмо пашалан кугыжаныш полышым пуышо целевой программыж почеш 2015 ий мучаште савыктыме.
Эртыше кечылаште Марий кугыжаныш университетыште книган презентацийже эртен. «Капар тукым» книгашке Валентин Борисовичын кок повестьше, але марте савыкталтдыме почеламутшо ден сонетше-влак, шарнымашыже, очеркше, сылнымут ой-каҥашыже пурталтыныт. Посна верым кодшо курымын 70-80-ше ийласе юнкор-влакын шке йӧратыме туныктышыштым пагален возымо шарнымашышт налеш. Ты савыктышым лукмаште Лидия Семёнова, Анфиса Эманова, Александр Белоусов тыршеныт. Ончылмутым Яныш Ялкайн лӱмеш да Марий Элысе Кугыжаныш премий-влакын лауреатше, Марий Эл Республикысе тӱвыран сулло пашаеҥже Гельсий Зайниев возен. Книга 500 экземпляр дене лектын.
Презентацийыш Валентин Борисовичын ятыр тунемшыже, йолташыже, коллегыже-влак толыныт. Тудын илышыже да усталыкше нерген лач поро мутым гына ойленыт. Чынжымак, Валентин Исенеков марий сылнымут, журналистике вияҥже манын, изи огыл надырым пыштен.
Каласен кодыман, Марий кугыжаныш университетысе Калыкле тӱвыра да тӱвыра кокласе кыл институтын студенткыже Светлана Михайлова профессор Раисия Кудрявцеван вуйлатымыж почеш поэтын йоча почеламутшо-влакым посна книгаш чумырен, да Одо кундемысе «Одо марий» ушемын полшымыж дене «Почеламут аршаш» лӱм дене савыктен луктын. Тиде книга ужалымаште уке.
Наталья Семёнован фотожо-влак;