Элыштына кино идалыклан пӧлеклалтше ятыр мероприятий эртаралтеш. Теве мутлан, Марий Эл Республикысе «ВийАр» тӱвыра да келшымаш кыл шотышто ушем тӱрлӧ идалыклан, лийже тиде Тӱвыра але Сылнымут идалык, шкешотан мероприятийым эртарен шога. Российысе кино идалыкыште ушемын еҥже-влак икмыняр мероприятийым эртараш палемденыт. Нунын кокла гыч иктыже – «УнчоFest» лагерь-семинар.
Лач тиде семинар 9 гыч 11 июль марте Морко районысо Унчо кундемыште эртен. Кинофестивальыш кумло наре журналист, оператор да кинолан шӱмаҥше чумыргеныт.
Лагерь-семинар жапыште сценарийым возымо, съёмкым организоватлыме, режиссёрын пашаже нерген мастар-класс да тӱрлӧ лекций, йыргешке ӱстел-влак эртеныт. Тидын годымак, кумылан-влак Сӱрем кумалтыште лийыныт.
Форумыш участник-влак шке фильмыштым, клипыштым жюри член-влаклан да калыклан аклаш конденыт.
Тыге жюри Гран-прим Курыкмарий кундем гыч Сергей Петуховлан «Историй ий-влакым лаштыклен» да «Сагает вэл» сылнысем клиплан пуэныт. Тидын годымак, Сергейын клипшым эн сай оператор паша семын акленыт. А эн сай режиссёрын пашажлан Мари-Турек гыч Иван Герасимовын «Китне вате-влак» фильмжылан пуалтын.
Кинолан эн сай сценарийым возымылан Светлана Гавриллован «Сурт кайык — еш поянлык» пашажым аклыме. А эн сай клиплан да калыкын призше «Унчо колхоз» фильмлан пуалтын. Авторжо Роберт Семенов. Тыгак участник-влак тӱрлӧ номинацийлаште аклалтыныт. Зинаида Эшкинина шке родо-тукымжым шымлен да фильмым ямдылен. Тудо «Этнографийыш надырым пыштымылан» номинацийыште палемдалтын. «Пеледше тукым» номинацийыште Вера Акпатырева «Пеледыш йоча сад» фильмыште аклалтын. Элнан тӱрлӧ памашышкыже экскурсий дене коштмо нерген Галина Петухова фильмым ыштен да «Турист корно» номинацийыште аклалтын.
Тидын годымак, кок кече жапыште,участник-влак тӱрлӧ группылашке, шкешотан студийлашке чумыргеныт да усталык пашам – кӱчык фильмым ямдыленыт.
Эн сайын ты пашам Унчо кундем гычак Роберт Семёнов ыштен, да сеҥышыш лектын.
Семинарын партнёржо семын «М-тур» турагенстве, «Амарис» мебель салон, «Семёновский» племзавод, «Икымше май» колхоз, М.Шкетан лӱмеш марий кугыжаныш драме театр, Тимофей Евсеев лӱмеш калыкле тоштер, Российысе калык, ООО «Алексия», Шернурысо сыр завод, керамике дене сӱретче Полина Метелькова, ООО «Лаюш», амалкалче Матвеев В.В., Россий Федерацийын Кугыжаныш Думын депутатше, Еш, ӱдырамаш да йоча йодыш шотышто комитетын вуйлатышын алмаштышыже Л.Н. Яковлева, «Марий Эл» Кугыжаныш Теле да радио компаний.
Форумым Марий Элысе «ВийАр» тӱвыра да келшымаш кыл шотышто мер ушем, Морко район Унчысо этнокультур комплекс, «Кидшер» интернет-журнал да Марий Элысе тӱвыра, печать да калык-вакын пашашт шотышто министерстве полшымо дене эртареныт.
