Марий Эл Республикысе Т.Евсеев лӱмеш калыкле тоштер официал сайтшын тӱсшым вашталтен, у функций-влакым ешарен.
Сайт моторрак да пайдаланыме шотышто куштылгырак лийын. Ресурс компьютер, планшет да смартфон гыч ончаш каньыл.
«Т.Евсеев лӱмеш калыкле тоштер филиалже-влакым ончыл радамышке луктынна. Ынде нуно тӱҥ лаштыкыште, пайдаланышылан шинчажлан коймо верыште улыт. Тоштерлаш толаш шонышо-влак ик лаштыкыште тӧнежыште эртаралтше событий да ончер-влак нерген уверым лудын кертыт», — каласкала Марий Эл Республикысе Т.Евсеев лӱмеш калыкле тоштерын директоржо Светлана Зверева.
Тидын годымак, сайтын пайдаланышыже-влак тематик экскурсийым, мастер-классым, лекцийым, шинчымаш программым мӧҥгӧ гыч заказатлен кертыт.
Идалык мучаш марте сайтыште уверым марий, руш да англичан йылме дене лудаш йӧн лектеш.
«Сайтым ме бета-версий дене пашашке колтенна. Тоштерын клиентше, сайтыш пурышо-влак деч шке шонымашышт дене палдараш йодына», — иктешлыш Светлана Зверева.
Марий Эл Республикысе Т.Евсеев лӱмеш калыкле тоштер – республикын ик эн тӱҥ тоштерже. 1920 ий 4 мартыште негызлыме. Тӱвыра учрежденийыш кажне ийын 100 тӱжем еҥ толын-кая. Тоштерын тӱҥ фондыштыжо 230 тӱжем ӱзгар шотлалтеш.
Николай Любимов, «Кидшер»