Кечым иктешлен: сӱрем тылзын 16-шо кечысе тӱҥ увер-влак

Сӱрем тылзын 16-шо кечысе тӱҥ увер-влак.

Республикым вуйлатыше Александр Евстифеев Марий Элысе туныктыш министр Наталья Адамова дене кеҥежымсе тазалыкым пеҥгыдемдыме кампанийын кузе эртымыже нерген мутланен. Палемдыме: икымше смене мучашлалтын. Тушто 181 организаций: школ пеленысе лагерь да ола деч ӧрдыжсӧ 8 лагерь пашам ыштеныт. Тудо сменыште 13 тӱжемат 300 утла йоча каналтен. Тидыже ӱмашсе деч шукырак. Кызыт ола деч ӧрдыжсӧ 16 лагерь пашам ышта. Тушто кум тӱжемат 600 утла йоча кана. Чыла лагерьым реестрыш пуртымо, тергыше организаций-влак нуным приниматленыт да умбакыже эскерат. Тулык йоча-влакланат тӱткыш ойыралтеш. 60 йоча «Орловка» ден «Молодость» лагерлаште кана. «Опора» мер организацийын эртарыме палаткан лагерьыште йоча пӧрт да тыглай еш 72 йоча гыч шуаралтеш. Евстифеев йоча- влакын лӱдыкшыдымылыкыштлан тӱткышым ойыраш кӱштен. Тыгак вашлиймаште эше ик йодышым ончымо: у тунемме ийлан тунемше- влаклан учебник ден учебно-методик материалым ситарымаш. Наталья Адамова ӱшандарен ойлен: тунемме книга-влак налалтыт, тудым кондаш ойпидыш кылдалтеш. Окса жапыштыже толеш.

Марий Элыште инвалид-влакын Россий кӱкшытан кумшо кеҥежымсе спартакиадыштын лач кыдалныже Марий Элым вуйлатыше Александр Евстифеев оргкомитетын заседанийжым эртерен. Ончылно эше ныл таҥасыме кече. Заседанийыште кокла лектыш- влакым иктешлыме, спортсмен-влакын пукшымо шотышто могай йодышышт лектеш, медицина полыш кузе пуалтеш да моло нергенат мутланыме. Спорт-туризм министр Лидия Батюкован мутшо почеш, финал таҥасымашке кок тӱжемат 28 еҥ толын. Нунын кокла гыч тӱжемат 278-ыже спортсмен, 196 судья, 554 тренер да ужатен коштшо еҥ-влак. Нуно 9 тӱшкагудышто илат. Йодышышт лектеш гын, вигак виктарен колталтеш. Кочмо шотышто нимогай йодышат уке. Пырля толшо ача-аваштланат тӱшкагудышто верым пуымо да кочкашат йӧным ыштыме. Лӱдыкшыдымылык шотышто паша чаткан шукталтеш. Тӱвыра да каныме программе радам дене кая. Медицина пашаеҥ- влак 11-ше июль гычак пашам ыштат. Икмыняр еҥ полышым йодын. Чылаштлан юватылде полышым пуымо. ВУЗ-лан ректорыштат нимогай замечаний уке манын палемденыт. Йошкар-Олан мэржат чыла сужба шке сомылжыи кӱлеш семын шукта манын палемден. Отчетым колыштмеке, Александр Евстифеев каласен: ончылно паша эше шуко, таҥасымашым мучаш марте сайын эртарыман.

Козьмодемьянск оласе «Паллада» парус клубын юнгыжо-влак шке парусникышт дене Коломна олаш миен толыныт. 25 кече жапыште рвезе-влак кок тӱжем утла меҥге кужытым ийын эртеныт. Походыш 11 рвезе миен. Кодшо кечылаште «Шнуй Косма» пуш марш сем дене мӧҥгыжӧ пӧртылын. Самырык моряк-влакым ача-авшат, лишыл еҥышт вашлийыныт. Поход жапыште юнго-влак «Океан-ТВ» телеканалын «Российысе кугу эҥер-влак» проектышкыже ушненыт.

Аркадий Сергеев

Кидшер
Шонымашым ешараш