Пеледыш пайрем — марий калыкын ик эн йӧратыме да вучымо пайремже. Ты пайремыште йӱлашке пурышо да у мероприятий-влакат лийыт.
20 июньышто Пеледыш пайрем жапыште марий калыкле тӱвыра фестиваль лиеш. Тудым Марий Эл Республикын Молодежь правительствыже, Марий Эл Республикысе калык-влакын ассамблейже да Тӱвыра печать да калык-влакын пашат шотышто министерстве эртарат.
Организатор-влакын увертарымышт почеш, фестивальын тӱҥ мероприятийже – тӱшкан шогалын марла куштымаш – Ленин площадьыште 17 шагатат 30 минутлан лиеш. Калык сем ӱзгар ансамбль-влакын шоктымышт почеш олыкмарий-влакын куштымашкышт кажне кумылан еҥ ушнен кертеш.
Фестивальын участникше-влаклан www.molmincult12.ru сайтыште регистрацийым эртыман. Эн ондак 500 регистрацийым эртыше еҥ-влаклан фестивальын эмблемыжым сӱретлыман пӧлек вуча.
Организатор-влак марий вургемым чиен толмылан куанат. Тыгак шкешотан рекордым палемдаш шонат: тӱшкан, чарныде, 15 минут куштыман.
Каласен кодыман, ты проектлан шке надырдам пыштен кертыда www.molmincult12.ru сайтыштак тыглай йӧн уло.
Пеледыш пайремын программыжым тӱрыснек ончалаш темлена:
Пӱнчер отысо Тумер алан
9.00 — Агавайрем
В.И. Ленин лӱмеш тӱвыра полат ончылсо площадке
11.30 — И.С.Палантай лӱмеш тӱвыра да сымыктыш колледжысе да В.И. Ленин лӱмеш тӱвыра полатысе коллектив-влакын концертышт.
12.00 — Уна-влакым вашлиймаш. Пайрем колонныш шогалмаш
12.15 — Пайрем колоннын тарванымаш
В.И. Ленин площадь
13.00 — Пайремым почмаш
17.30 — «Йыр куштымаш» фестиваль
19.00 — Марий эстрадын шӱдыржӧ-влак дене пырля этнодискотеке
Тӱвыра да каныме Рӱдӧ парк
11.00 — Тӱҥ аллей: «Кудо» конкурс
Кидмастар-влакын ончыкташ да ужалаш лукмо ӱзгар ончер
14.30 — Тулото алан: Марий Элысе да Российысе марий фольклор коллектив-влакын концертышт
Кеҥеж эстраде алан: «Пеледыш аршаш» йоча программе
Спорт алан: «Онарын тукымжо» таҥасымаш: солык ден кучедалмаш, кирам да пундышым нӧлтымаш, пу сорымым пӱчмаш.
15.30 — Кеҥеж эстраде алан: «Мелна пайрем»
Сеҥымашын XXX-шо идалыкше лӱмеш тӱвыра полат ончылсо площадке
15.00 — «Кушталтен, каналтена» фольк-шоу
16.30 — «Марий кас»: гармончо, тӱмырзӧ, мурызо-влакын конкурсышт
Автор: Николай Любимов.